Gino Valle, si vierç la mostre sul grant architet

Joibe ai 7 e vierzarà a Cjase Cavazzini a Udin la mostre “Gino Valle. La professione come sperimentazione continua”, dedicade ae opare dal innomenât architet furlan, nassût a Udin propit ai 7 di Dicembar dal 1923 e muart intal 2003. Pal centenari de nassite, i museus civics, in colaborazion cu la famee, a àn decidût di celebrâlu cuntune esposizion che e pandarà gnovis bandis de sô largje produzion. Traviers dissens e fotografiis di epoche, modei e elaborâts grafics, e ven contade la ativitât di Gino Valle, che in plui di cincuante agns di ativitât al à dât vite a une produzion architetoniche tant plene di diviers aspiets. La grande varietât che e caraterize la sô opare e je il risultât di un procès progjetuâl unic e specific, une ativitât straordenarie che si môf in libertât tra diferencis di scjale, lengaçs e programs, spaziant di dimensions locâls a ambits internazionâi. La famee Valle e à permetût, cul so materiâl, di lâ insot di un percors gnûf, traviers oparis realizadis tra i agns Cincuante e i Otante. (A.I.) – 06.12.2023