Gurize e celebre l’alpinist Julius Kugy

Intal 2024 si son celebrâts i otante agns de muart dal alpinist, botanic e scritôr Julius Kugy, nassût a Gurize ai 19 di Lui dal 1858, intun dai edificis dongje dal palaç Coronini Cronberg. Propit par chest leam, la Fondazion Palazzo Coronini Cronberg e celebre il “Poete des Juliis” cuntune mostre che e conte la sô vite, la sô passion pe musiche e la botaniche, la sô vision particolâr de mont e dal alpinisim. “Julius Kugy e donne in quota” (Julius Kugy e feminis a cuote alte) e conte storiis di mont di altris protagoniscj, tant che la contesse Carmen Coronini Cronberg e lis sûrs Grassi di Tumieç, dai 8 di Jugn e fint ai 6 di Zenâr dal 2025. (A.I.) – 07.06.2024