Gurize in memorie dal filosof Michelstaedter

Par memoreâ l’aniversari de muart dal scritôr e filosof Carlo Michelstaedter, ai 17 di Otubar dal 1910, la Biblioteca statale Isontina di Gurize e propon une visite vuidade straordenarie ae mostre inte sede di via Mameli, lunis ai 17 aes 5 dopomisdì. La mostre sul leterât gurizan, muart prin de ore a 23 agns, e propon oparis di norme no esponudis, se no intal cors di mostris fûr sede o di visitis vuidadis ae biblioteche. La iniziative e larà indevant intai mês che a vignaran, par acompagnâ sedi i utents de Bsi, sedi i visitadôrs ocasionâi. Intal mês di Otubar e ven proponude une prime selezion di documents significatîfs; daspò, cun cadence bimensîl, e larà indevant cu la esposizion al public di une sielte di tocs – sfueis manuscrits, racueltis e tacuins – a rotazion. (A.I.) – 17.10.2022