I 45 agns de “Leç Basaglia” su Radio Onde Furlane

Si intitule “Marco e Adelina. Viaç inte salût mentâl in Friûl-Vignesie Julie tal passât e tal presint” la serie radiofoniche di sîs pontadis, curade e condote di Margherita Cogoi e Marta Savorgnan. Il percors proponût su Radio Onde Furlane al zonte esperiencis individuâls e coletivis, celebrant i cincuante agns de prime volte che Marco Cavallo – riclamât ancje tal titul dal program – al le fûr dal manicomi di Triest. E ancje il cuarantesim cuint aniversari de aprovazion e de jentrade in vore di chê che i disin “Leç Basaglia”, il proviodiment che al à consintût la sierade dai manicomis e il passaç de segregazion ae cure. La pontade di scree dal program dedicât ae salût mentâl, viodude e analizade di plui ponts di viste, e je in program par sabide ai 25 aes 2 dal dopomisdì. (A.I.) – 23.02.2023