I arbui (e tant altri) tal parc de vile di Buri

Sience, culture, art, balet, musiche e cine in dialic a Buri, te Vile di Toppo Florio e tal so parc, pe cuinte edizion dal “TreeArt Festival”, che di joibe ai 11 fint a domenie ai 14 di Lui al met adun artiscj, sienziâts e divulgadôrs di nivel talian e internazionâl par un cartelon plen di peraulis, incuintris e spetacui. Ancje chest an, al centri al è un element di atualitât par l’ecuilibri di ambient, clime e incressite des nestris citâts: “il Suolo”, il teren, che al da ancje il titul ae edizion e al è un aleât pe regolazion dal clime e dal sisteme urban. La edizion e sarà vierte di une schirie di cunvignis par cure dal comitât sientific cun incuintris che a tiraran dentri esperts e citadins. A fâ il struc, il “turist par câs” Patrizio Roversi, un personaç storic de television e pe sensibilizazion su la sostignibilitât. Tal parc a saran spetacui di danze, musiche e la gnove opere di art “Così in cielo così in terra” di Lello Ronca, che e larà a zontâsi ae colezion di art contemporanie tal viert. (A.I.) – 10.07.2024