I Basevi a Udin, une storie di sucès, ma ancje di discriminazions

Vinars ai 27 di Zenâr, aes 6 di dopomisdì in Sale Ajace a Palaç D’Aronco, te suaze des iniziativis promovudis dal Comun pe Zornade de Memorie 2023 al è in program un incuintri dal titul “I Basevi di Udine: le multiformi vicende di una famiglia ebraica in Friuli”. L’avocat Massimiliano Basevi e il storic Valerio Marchi, insiemi al diretôr dal Messaggero Veneto Paolo Mosanghini, a fasaran un ritrat de storie de famee ebraiche udinese dai Basevi: un non che pai furlans al è simpri stât sinonim di mode, te buteghe elegante vierte a Udin te centralissime vie Marcjât Vieri ae fin dal Votcent. La introduzion dal prêt-à-porter, la instalazion te regjon de prime fabriche di confezions in serie e la integrazion a plen tal tiessût sociâl e culturâl de citât a àn determinât un sucès impuartant durât tal timp. Ma no mancjavin, nancje dîlu, lis vicendis leadis ai agns teribii des discriminazions e des persecuzions antisemitis. (A.I.) – 25.01.2023