I cuadris di Ligabue pe prime volte in regjon

Passe 60 oparis tra cuadris a vueli, dissens e sculturis a saran protagonistis, tal Museu Revoltella di Triest, dai 8 di Novembar fint ai 18 di Fevrâr dal 2024, de prime mostre antologjiche dedicade a Antonio Ligabue in Friûl-Vignesie Julie: une conte de vite e de opare di un om che al à fat de sô art il riscat de sô stesse esistence. Antonio Ligabue, un dai artiscj talians plui umans e comovents dal Nûfcent, cu la sô vite cussì cruziade, escludût dal rest de sô int, leât in maniere profonde al mont naturâl e animâl e lontan dal judizi di chei altris, al rivà a imprimi su la tele il so gjeni creatîf. Artist visionari, autodidat e sfortunât, al jentrà intal anim dal grant public parcè che al jere bon di fevelâ a ducj cu la sô art. (A.I.) – 07.11.2023