I fradis Basaldella a Passons: une mostre di oparis raris

Une serie di oparis di rare vision dai fradis Afro e Mirko Basaldella, che a vegnin di colezions privadis, e compon la mostre “Tra astrazione e realtà”, che fin ai 13 di Novembar e permet di amirâ une ventine di cuadris, sculturis e araçs ufierts di râr ae viste dal public. A proponi la esposizion, intes salis dal oratori parochiâl di Passons, e je la associazion All’ombra del campanile, che di agns e risierve une atenzion particolâr pal mont de art. Intai spazis di vie Villlalta a son esponûts ancje un araç di Afro di dimensions impuartantis, fat intal 1973, “Il grande grigio” dal 1974, e grafichis tant che “Campiello” (1970). Fra i dissens e lis tecnichis messedadis di Mirko a risaltin “Maschera giapponese”, “La sposa”, “Struttura architettonica”, “Suonatore” e “Totem”. (A.I.) – 08.11.2022