I partesans li dal Museu di Aquilee

La Fieste de Liberazion e sarà la ocasion par presentâ al public une testemoneance comovente vignude fûr dal studi de documentazion storiche dal Museu di Aquilee, cuntune conference in program miercus ai 24, aes 5.15 dopomisdì. Il Museu al à une schirie di regjistris là che tancj visitadôrs, plui o mancul famôs, a àn metût la lôr firme, acompagnade dispès di un salût o di un coment. Si pues cussì ripassâ la storie dal museu e dal so teritori traviers peraulis, nons e divignincis dai visitadôrs. Al è stât duncje pardabon emozionant scuvierzi cui che al à visitât il museu ai 30 di Avrîl dal 1945, intes oris dramatichis che a sieravin la ocupazion nazifassiste de Basse Furlane (diliberade dome cualchi dì daspò dai 25 di Avrîl, compagn di une buine part de regjon). A jerin un grup di partesans che a àn sintût la dibisugne di lassâ il segn dal propri passaç. (A.I.) – 23.04.2024