I spetacui ancje cun e pai disabii

Al torne dai 29 di Fevrâr fint ai 2 di Març, li dal Spazio35 di Udin pe sô seconde edizion, “Zero gradi di separazione”: un progjet formatîf pensât par oms e feminis che a lavorin tal setôr de culture e in chel sociâl par promovi la inclusion. E soredut par judâ la partecipazion lis personis cun disabilitât a partecipâ ai events di teatri, bal e vie indevant leâts ae produzion contemporanie. Lis trê zornadis progjetadis de associazion Quarantasettezeroquattro, fatis di cors intensîfs di profondiment e laboratoris, a saran curadis di Ginevra Bocconcelli e Valeria La Corte de associazion Fedora. Il fin al è chel di lâ cuintri la esclusion dai artiscj disabii e des artistis disabilis e favorî la jentrade dal public cun disabilitât midiant une azion concrete. (A.I.) – 28.02.2024