I zovins a scuele tal bosc par deventâ “leader”

I ‘cjâfs’ dal avignî si formin cu la educazion, cul confront e tal cûr des Alps Juliis, in graciis dal forum internazionâl dai zovins pe rigjenerazion “NanoValbruna”. Une manifestazion di nivel internazionâl, ideade e inmaneade de associazion di promozion sociâl ReGeneration Hub Friuli, in program a Valbrune dai 18 ai 24 di Lui. Soredut, al è un moment di confront e di scambi par sienziâts, imprenditôrs, gjornaliscj, visionaris e visionariis di dut il mont. E, nancje dîlu, un grum di zovins di talent, cul fin di frontâ ducj adun lis sfidis dal nestri timp cuntune azion sociâl e la educazion a deventâ imprenditôrs. Ancje chest an al spiche il concors internazionâl di ideis “Baite Award”, unic tal so gjenar a nivel regjonâl, pensât par zovins ricercjadôrs, students e imprenditôrs di doman, che a àn fat in dut 46 progjets: 11 a son chei selezionâts, e che ai 23 di Lui a saran valutâts di une jurie di esperts talians e internazionâi tal palaç Veneziano. La novitât di cheste edizion al è un altri concors, “Frame The Change”, pe creazion di curtmetraçs su la rigjenerazion, zirâts cul smartphone di 15 students e studentis, selezionâts in colaborazion cul Dams de Universitât dal Friûl. I zovins si metaran in vore cul regjist roman Valerio Ferrara, che al à za vinçût al festival di Cannes, e cun Diego Bellante. (A.I.) – 17.07.2024