Il borc al torne a someâ un cuadri dal Votcent

Al è stât presentât a Polcenic il progjet di ricualificazion dal borc di Culture, frazion dal Comun, là che di fat a son stadis la art e la storie de art a detâ i timps e i mûts de azion urbanistiche. Intitulât propit “Il recupero dei luoghi di Luigi Nono” (Il recupar dai lûcs di Luigi Nono), chest grant progjet, che al tire dentri une part impuartante di un dai borcs plui biei de Italie, al è stât ispirât propit aes oparis pituradis di un mestri dal Votcent, l’artist Luigi Nono. Al è stât fintremai metût l’aspiet culturâl prime di chel funzionâl, cirint di tornâ a puartâ al dì di vuê une atmosfere dal Votcent midiant la trasformazion in “lûc” di chel che il timp al veve fat deventâ dome un “spazi”. I elements che a son ae fonde de ricualificazion a son passâts traviers il confront cui cuadris di Nono, e ancje i intervents di furniment de citât a son stâts pensâts e fats par rinfuarçâ il ricuart de presince dal Mestri intai lûcs che a àn cetant segnât la sô piture. Cualchi opare che e je stade di ispirazion pal lavôr e sarà esponude al public fint al 30 di Jugn te canoniche e tal claustri de glesie di S. Jacum. (A.I.) – 20.05.2024