Il cafè a Gurize al devente une opare di art

E profume di cafè la edizion 2024-2025 di “Per Forma”, che e celebre propit la produzion de amade bevande, a Triest e Gurize. Sieradis lis residencis artistichis, ai 25 e ai 26 di Zenâr, palaç De Grazia a Gurize al ospitarà “M.M.MOCA – MetaMultiMuseo del caffè”: un percors performatîf de durade di 45 minûts, par 30 spetatôrs ae volte, par cure di Hombre Coletîf, Caterina Marin e Benedetta Parisi, cun trê compagniis di artiscj sot dai 35 agns cjapadis dentri. Il progjet artistic al vûl contâ traviers i lengaçs dal teatri contemporani dut ce che al è ator dal cafè, de culture intai paîs di origjin fint ae cjicare tal bar, cul obietîf di valorizâ il leam fra impresis e lis citâts che lis ospitin.  (A.I.) – 22.01.2025