E je ancje la Marilenghe tra chês che cumò si pues doprâ cul tradutôr automatic di Google. La rivade dal furlan e je propit une des novitâts intal servizi a gratis di “Google translate”, che a cjapin dentri ancje dialets talians come il lombart, il venit e altris cun 110 lenghis gnovis in dut.
Il tradutôr automatic al dopre la Inteligjence artificiâl e al è stât perfezionât in graciis dal lavôr de Arlef (Agjenzie regjonâl pe lenghe furlane).
Chest strument a pene rivât al varà dibisugne di jessi regolât, ma si trate di une gnove une vore preseade: “O voi daûr ae evoluzion di Google di cetancj agns – al à dit Cristian Feregotto, aministradôr de Infostar a cjâf dal grup Telecomunicazions e informatiche di Confindustria Udine – e o pensi che chest strument al sedi pardabon impuartant. O sai che la Arlef, soredut cul so diretôr William Cisillino, e à lavorât une vore par chest”. (a.d.g.) – 16.07.2024
