Il gardenâl Ravasi al scree la vincjesime “pordenonelegge”

Dai 18 ai 22 di Setembar e torne “Pordenonelegge”, une rassegne che e je un event di no pierdi a nivel talian par cui che al crôt tal valôr de leture, de scriture e de cognossince, ancje in forme di clâf par capî miôr il dì di vuê. La vincjesime cuinte edizion de fieste dal libri, dai letôrs e dai editôrs, inmaneade de fondazion Pordenonelegge, e je chest an ancje une fieste “de libertât” par lâ insot des tematichis dal mont. E di simpri al è un progjet centrâl pe vite di dute une citât, che ancje par chest si è za candidate a deventâ “capitâl europeane de culture” pal 2027. I numars di cheste edizion a son grandonons: passe 600 autôrs par plui di 300 events in cinc dîs, ator pe citât là che il festival al è nassût, ma ancje in altris lûcs, in 43 puescj diferents fint a Lignan, Triest e Udin. La liste dai altris ospits e je une vore lungje e no son dome scritôrs: pe scree a Pordenon, joibe ai 18 al rivarà il gardenâl Gianfranco Ravasi, dome che il prin di cetantis vôs che a metin adun culture, societât, lis cuistions dal ambient, des vueris, de economie. Ma ancje sience, filosofie, politiche, economie, identitât, sport e gnovis tecnologjiis, contâts dal filosof francês Bernard-Henri Lévy, dal scritôr american Richard Ford, de scritore iraniane Azar Nafisi, de ucraine Oksana Zabužko e dutis lis firmis plui innomenadis de narative taliane e di chê furlane, selezionâts dai curadôrs Alberto Garlini e Valentina Gasparet. (A.I.) – 17.09.2024