Il pitôr dal cidinôr a Tumieç

Si intitule “In ascolto” (In scolte) la mostre personâl di Claudio Mario Feruglio, che si scree sabide ai 4 a Palaç Frisacco di Tumieç e che e presente une selezion di cincuante oparis sieltis, realizadis dal mestri furlan dal 2007 al 2022. Il teme, cjâr al autôr, al è la poetiche dal cidinôr. Za Carlo Sgorlon al veve definît di fat Feruglio “il pitôr dal cidinôr e de scolte sot vie de musiche sovrane dal univiers”. Intal cors de sô ativitât, de formazion academiche al dì di vuê, Feruglio al à fat oparis unichis, moduladis secont un lengaç che al invide ae scolte interiôr. (A.I.) – 03.02.2023