Il pitôr furlan che al à vût sucès in Americhe

Intal 1957 il zovin artist furlan Mario Micossi, nassût intal 1926 a Dartigne, dopo i studis te Academie di Bielis Arts di Rome e un lunc tirocini dal vêr e intai museus di Rome, al inviave cualchi so dissens ae prestigjose riviste statunitense “The New Yorker”, che daurman ju cuistave e i garantive un minim setemanâl par restâ a New York e lavorâ pe sô redazion. E tacave cussì une lungje colaborazion che e meteve Micossi inte suaze artistiche statunitense, cun tantis mostris personâls inmaneadis a New York, Washington, Boston, New Haven, Los Angeles, Toronto, ma ancje a Milan, Munic di Baviere, Vilac e ancje a Udin. A cuasi 20 agns de muart, la sô opare e la sô conte par imagjins de mont a tornin a vivi inte mostre che si scree vinars ai 13 inte Glesie di Sant Laurinç a S. Vît dal Tiliment, dulà che e sarà visitabile fint ai 27 di Otubar, par iniziative dal CICP-Centri Iniziativis Culturâls di Pordenon. “Amor naturae. La mont” e je la seconde tape de trentesime tierce edizion dal Festival Internazionâl di Musiche Sacre, chest an di sene sul teme “Charitas”. (A.I.) – 10.09.2024