Il premi ‘Appi’ a un poete brasilian, emigrant di seconde gjenerazion

Il Premi di poesie “Renato Appi”, promovût dal Comun di Cordenons in colaborazion cul Grup dal Ciavedal, si conferme un concors simpri plui internazionâl. Il vincidôr de decime seconde edizion al è un brasilian, Lucas Leme Meneghin, emigrant di seconde gjenerazion cun lidrîs che a partissin propit di Cordenons. Resident a Limeira, inte regjon di S. Paulo, al à vinçût cu la poesie “Nostalgje di chel postu che no ai conusut” il Premi Citât di Cordenons. A ritirâ il premi al è stât un rapresentant de famee, il cusin André Meneghin, che al è a stâ a Londre e che al à volût, in chest mût, cognossi il teritori di dulà che a vignivin i siei antenâts. (A.I.) – 11.09.2023