Il Premi Luchetta al à sielt i 24 finaliscj

Teritoris slambrâts dai conflits, tieris colpidis di cjaristiis, presons dulà che i minôrs a son costrets a cressi cu lis maris detignudis, vuarfinis di feminicidi, la rote balcaniche… A son i temis dai servizis e dai reportage finaliscj de vincjesime prime edizion dal premi gjornalistic internazionâl “Marco Luchetta”, nassût in memorie dai gjornaliscj Marco Luchetta, Alessandro Saša Ota, Dario D’Angelo e Miran Hrovatin. Selezionâts de jurie vuidade di Riccardo Iacona, a son 24 i autôrs e lis autoris rivâts ae finâl pes siet sezions dal concors: Rote balcaniche, Reportage, Stampe taliane, Gnovis pe television, Radiofonie, Stampe internazionâl e Fotografie. I servizis e lis fotografiis a son stâts sielts tra passe cent de Italie e dal forest. I vincidôrs e lis vincidoris di ogni sezion a vignaran premiâts ai 17 di Novembar che al ven a Triest.  (A.I.) – 16.09.2024