Il “Premio Nonino” al da l’apontament al an che al ven

Nuie “Premio Nonino” intal 2023. I organizadôrs a dan l’apontament al an che al vignarà: compagn che intal 2020, cuant che al jere stât scancelât par un impegn impuartant de famee che di cuasi 50 agns al organize la rassegne, che tant dispès e à anticipât i Premi Nobel. Il Premio Nonino – An cuarantesim sest si tignarà sabide ai 27 di Zenâr dal 2024, daûr de tradizion a Roncjis di Percût, aes Distilariis Nonino. La Jurie dal Premi e sarà insiorade di trê gnûfs membris: il scritôr libanês Amin Maalouf, la poetesse statunitense Jorie Graham e il filosof talian Mauro Ceruti. Dopo un altri stop, intal ‘21 pe pandemie, l’an passât lis premiazions si jerin fatis regolarmentri, ma in tal mês di Mai. (A. I.) – 31.01.2023