La vincjesime prime edizion dal Premi “Terzani” e je stade assegnade ae memorie des gjornalistis e dai gjornaliscj palestinês copâts a Gaza. L’anunzi al è vignût di Angela Terzani Staude, presidente de jurie, che cun decision ecezionâl e unanime e à sintût la urgjence di butâ un alarme. E di fâ onôr al sacrifici di cui che al è stât metût a tasê e che nol pues plui contâ “chê altre part de storie”, propit conferint il Premi. “Mai, inte storie, – si lei inte motivazion dal Premi “Terzani 2025”, pe prime volte ae memorie – il tribût paiât dal gjornalisim al jere stât cussì pesant, in violazion dal dirit umanitari e de libertât di stampe”. La serade di sabide ai 10 di Mai tal Teatri Gnûf “Giovanni da Udine” e sarà dedicade a chei oms e a chês feminis copâts dilunc de vuere: a vê in maniere simboliche il premi a non dai coleghis a saran Wael al-Dahdouh e Safwat al-Kahlout de emitente Al Jazeera. (A.I.) – 09.04.2025
35
