Inte jentrade di Cjase Cavazzini une statue di Dino Basaldella

Dopo la sale titulade a Giuseppe Zigaina e la mostre dedicade a Gino Valle, il museu di Art moderne e contemporanie di cjase Cavazzini a Udin al riscuvierç un toc impuartant dal so passât. Daspò di une opare atente di restaur, fate ancje in graciis dal contribût de Fondazione Friuli, la sculture “El Partidor” (fate intal 1964) di Dino Basaldella e je tornade a slusî e cumò e je inte jentrade dal museu. “El Partidor” e je un esempli di cemût che Dino Basaldella, za intai agns Sessante, al saveve trasformâ i vanzums di fier de industrie in oparis di art potentis e sugjestivis. La statue e rapresente un moment centrâl dal timp dai “fiers” di Basaldella, di grant ferment creatîf e professionâl, che lu à puartât a otignî ricognossiments internazionâi. Un di chei al fo la partecipazion ae Bienâl di Vignesie dal 1964 e ancje chel ae Cuadrienâl di Rome dal 1965-1966. (A.I.) – 16.07.2024