Kennedy contât al cine di Oliver Stone

E va indevant a Glemone la dediche al regjist american Oliver Stone de Cineteca del Friuli inte suaze de rassegne par cure di Sergio M. Grmek Germani, che e ven dongje de mostre “Allo specchio dell’era Kennedy”, vierte tal Cjistiel di Glemone. Un dai autôrs plui preseâts e provocatoris dal cine american di vuê, Oliver Stone, al è il regjist che plui di ducj chei altris si è interessât di John F. Kennedy, judicât il president plui inovatîf dal secul vincjesim. Miercus ai 17 li dal cine “Sociale” al sarà presentât “Nixon. Gli intrighi del potere”, fat tal 1995 e cul president dai Stâts Unîts interpretât di Anthony Hopkins. Sabide ai 20, dôs pontadis de sô “cuintristorie” americane, “The Untold History of the United States”, dedicadis propit a Kennedy. (A.I.) – 16.04.2024