Kugy: a Gurize cumò in mostre i siei libris

In zonte ae mostre de Fondazion Palaç Coronini Cronberg “Storie di montagna a Palazzo Coronini. Julius Kugy e donne in quota” (Storiis di mont a Palaç Coronini. Julius Kugy e feminis a cuote alte), che si è sierade cuntun grant sucès, intai spazis de Biblioteche Statâl di Gurize e je stade metude adun fint ai 23 di Avrîl une esposizion des oparis principâls di Julius Kugy, conservadis intai fonts de Biblioteche stesse. Dilunc de Vuere Grande, Kugy al à scomençât a scrivi il so prin libri “Aus dem Leben eines Bergsteigers” (De vite di un alpinist), publicât intal 1925. La opare e à segnât il principi di une gnove fase de vite di Kugy che, improibît de etât e dai problemis fisics a lâ indevant cu la ativitât di alpinist, si è dedicât a chê di scritôr. La esposizion e je une ocasion par riscuvierzi lis oparis principâls di Kugy, vuê cuasi dutis impussibilis di cjatâ, sedi intes versions origjinâls in lenghe todescje, sedi intes traduzions par talian, e une selezion dai plui impuartants scrits dedicâts a lui, par talian e par sloven, tacant dal storic saç di Celso Macor. (A.I.) – 14.01.2025