La acuile dal Friûl e fâs fieste par un mês

Chest an la Fieste de Patrie dal Friûl e va indevant par un mês. Ai 3 di Avrîl dal 1077 si celebre la nassite dal Stât Patriarcjâl furlan, la istituzion che fin al decim cuint secul e à dât adun il Friûl e tancj altris teritoris intun unic organisim statuâl. Inmaneade de ARLeF-Agjenzie regjonâl pe lenghe furlane, la celebrazion uficiâl de Fieste e dai avigniments corelâts e je tacade za joibe ai 23 di Març a Muçane, là che al è stât presentât il documentari “Aquilee. La storie di une capitâl” di Marco D’Agostini e Luca De Clara. Vinars ai 31 di Març, aes 8 e mieze di sere, tal centri civic di Favuîs di Gonârs, la identitât si mudarà in musiche, in gracie de presentazion-conciert di “La musine dai cjants” di e cun Lino Straulino. La sabide, prin di Avrîl, aes 6 sot sere, te arene di Porpêt (dongje de glesie), lis sonoritâts a cjaparan sù ancje la ande dissacrante dai LaipNessLess, cu la lôr lenghe sclete. (A.I.) – 29.03.2023