La Afriche che nissun al conte: al cine e no dome

E torne a Pordenon fint ai 14 di Dicembar la rassegne di cine e di culture “Gli occhi sull’Africa” (I voi su la Afriche), rivade ae decime otave edizion: un travuart impuartant pe iniziative promovude di Cinemazero, Caritas, Centri culturâl Cjase dal Student Zanussi, Centri Missionari Diocesan, in colaborazion cun Pordenone Docs Fest e altris realtâts associativis dal teritori. Si scomence martars ai 5 cu la mostre “Terra Madre, la sfida della sostenibilità ambientale in Africa” (Tiere Mari, la sfide de sostignibilitât ambientâl in Afriche), che si scree li de Cjase dal Student “Zanussi”. Il nucli centrâl, daûr de tradizion, al è fat di cines e di documentaris che a puedin dâ une cjalade inedite suntun continent plen di storie e di contradizions, ma che al va cognossût di là dai stereotips, traviers lavôrs di autôr che no si cjatin intai normâi circuits di distribuzion cinematografiche. A son previodudis ancje presentazions di libris, mostris e concierts. (A.I.) – 05.11.2024