La Americhe in vuere dopo la muart di Kennedy

La rassegne de Cineteche dal Friûl che e met dongje la mostre “Allo specchio dell’era Kennedy”, inmaneade di Comun e Cineteche tal Cjistiel di Glemone, e va indevant cun cualchi cine râr e mai viodût prime in Italie e sottitulât pe ocasion. Tal prin apontament di Març, miercus ai 13 li dal Cine ‘Sociale’ di Glemone, si fronte il teme dal grant traume dal Vietnam, che dopo la muart di Kennedy al à vût disvilups contraris a chei che a jerin lis sieltis di politiche internazionâl de presidence Kennedy, o sedi la ricercje di acuardis che a evitassin la vuere. La serade, presentade dal storic dal cine Sergio Grmek Germani, e presente doi cines: il curtmetraç di propagande “Why Viet-Nam” dal 1965 e la pelicule europeane di doi agns dopo “Loin du Vietnam” (Lontan dal Vietnam). (A.I.) – 12.03.2024