La Anpi e restaure trê cuadris su la Resistence di innomenâts artiscj furlans

Trê impuartant pituris dal ‘900 furlan a son tornadis a gnove vite. Si è sierât di fat il restaur di trê oparis ispiradis ae Resistence e al ambient dal Cjars, fatis di autôrs innomenâts dal secul passât: Sergio Altieri, Guido Tavagnacco e Enrico De Cillia. I cuadris, che a fasin part de colezion siore di oparis di art che, tacant dai agns Cincuante, si è formade par iniziative de Anpi di Udin, si podaran di gnûf amirâ inte sede de associazion, in vie Brigata Re. I intervents a son stâts fats des restauradoris de societât Laboratorio Artigiano Arte e Restauro, in graciis dal contribût de Fondazione Friuli. I cuadris a son pituris a vueli su tele che a vevin bisugne di un restaur des cundizions di conservazion.  (A.I.) – 29.11.2022