La Aquilee romane sul fonts dal mâr di Grau

Siet lûcs archeologjics intes aghis di Grau – relits navâi, un altâr funerari di epoche romane e struturis somerzudis di nature monumentâl – a son stâts indagâts de Unitât di archeologjie subacuie de Universitât dal Friûl. L’obietîf des ricercjis e je la ricostruzion dal paisaç archeologjic tra il mâr di Grau e la Aquilee romane. La aree des aghis che a contornin la isule e je di fat une part di chê che in epoche romane e jere la perifarie di Aquilee. Lis ativitâts a son stadis fatis in colaborazion cu la Sorintendence archeologjie, bielis arts e paisaç dal Friûl-Vignesie Julie. Cheste e je la prime campagne di investigazions dal progjet “Aquileia Waterscape” dal Dipartiment di Studis umanistics e dal Patrimoni culturâl dal Ateneu di Udin. Tra i sîts plui interessants a son chês che ur disin “Pieris di S. Gotart”, a pôc plui di 1,5 chilometris a sud-est de bocje lagunâr di Grau. (A.I.) – 08.10.2024