La gnove frontiere de comunicazion

Al è dedicât ai ‘social’, la gnove frontiere de comunicazion, il secont festival de informazion “Il mondo fuori”, inmaneât dal Comun di Cormons. Trê dîs, di vinars ai 8 fint a domenie ai 10 di Novembar, par fevelâ di cemût che la rêt e à cambiât dut tai ultins dîs agns: no dome par cui che al fâs informazion, ma ancje tes relazions di ogni dì, la cussience sociâl, la comunicazion politiche e chê sientifiche. La diretore artistiche Luana de Francisco e à decidût di inmaneâ un viaç te ete digjitâl bon par ducj. Pai grancj, dispès no masse usâts a doprâ i ‘social’ e a vivi tal mont ‘virtuâl’. E soredut pai zovins, che tal prin apontament a cjataran Vincenzo Schettini, un dai professôrs plui preseâts in rêt, e po dopo Andrea Maggi, insegnant, scritôr e personaç innomenât de television. Ma soredut, e ancje, i creatôrs di ‘YouPalTubo’, che cu la Arlef a lavorin in rêt par promovi la lenghe e la culture furlane te ete digjitâl. (A.I.) – 07.11.2024