La grande imprese di Romano Pers a Trivignan

Sabide ai 15 aes 6 di dopomisdì si scree la mostre “Tal grandiôs Padilion de Serenissime” intai spazis dal Museu dal borc storic di Clauian. La esposizion e sarà vierte de leture seniche des poesiis in lenghe furlane di Romano Pers par cure di Poesie a Manovella: Chiara Dorigo, Sara Francovig e Stefania Pittioni. L’avigniment al è fat par cure di RAVE East Village Artist Residency in colaborazion cul Comun di Trivignan Udinês. La Serenissime, nassude dal estri creatîf di Romano Pers, contadin, musicist e poete nassût a Trivignan ae fin dal 1800, e je une testemoneance uniche no dome di un moment storic precîs, ma di une esperience che e à viodût il costant alternâsi di dolôr e opression cun riscat vitâl e gjonde coletive. Intai agns Vincj dal secul passât, cul jutori dai siei fradis, Romano al veve traspuartât di Dael un grant fabricât militâr, dismetût dopo la fin de Prime Vuere Mondiâl, fint a Trivignan, dulà che vie pal Invier si trasformave ancje inte sale di bal plui grande de regjon! (A.I.) – 14.03.2025