La Italie dal Pasolini ‘no finît’ ae Amidarie di Rude

Al è il romanç no finît dal Nûfcent che al à gjenerât plui visions discordantis e interpretazions antitetichis: salacor propit chest al voleve otignî il so autôr. “Petrolio”, il romanç veretât di Pier Paolo Pasolini publicât intal 1992, ben 17 agns dopo la muart dal autôr, al è une des espressions massimis di un autôr che al veve decidût di metisi in zûc dal dut. Propit di une leture e riflession su “Petrolio” e tache la ultime fase dal progjet “Noi, non popolani nella stretta del popolo contadino”, che par celebrâ il centenari dal inteletuâl e à proponût par dut l’an spetacui teatrâi e conferencis a lui dedicadis. Par sierâ, la associazion Studio Giallo e propon la leture “L’Itaglia di Petrolio”, recitade dal regjist e atôr Maurizio Soldà, martars ai 29 aes 6.30 dopomisdì li de ex Amidarie Chiozza di Rude, cun repliche siet dîs dopo devant dal ex studi di Zigaina. (A.I.) – 28.08.2023