La mont e je plui ‘verde’ viodude di Pordenon

E tache miercus ai 13 la gnove edizion dal progjet dal Teatri “Verdi” di Pordenon inte suaze dal Montagna Teatro Festival: “R-Evolution Green”, une rassegne ideade e inmaneade cul CAI, il Circul Alpin Talian, che e previôt in dut cinc incuintris cun esperts, scritôrs, climatolics e storics. Curâts e moderâts di Mauro Varotto, docent di Gjeografie de Universitât dai Studis di Padue, a vuelin rifleti suntune gnove idee de mont. L’incuintri di viertidure dal titul “Cincuante sfumaduris di vert: arbui, boscs, forestis” al è in program aes 6 dopomisdì tal Ridot dal Teatri “Verdi”: protagoniscj doi “esperts di arbui”, Matteo Melchiorre, diretôr de Biblioteche dal Museu e dal Archivi Storic di Castelfranco Venit, e il scritôr Luigi Torreggiani. (A.I.) – 12.11.2024