La mont e jentre intal teatri di Pordenon

Il Teatri “Verdi” di Pordenon al vierç un gnûf spazi di riflession tor de mont, che si met dongje dai progjets za inviâts in chescj agns pe valorizazion dal ambient, la difese de nature, la lote cuintri il dispopolament e l’abandon des tieris altis. Inte suaze dal “Montagna Teatro festival”, di joibe ai 20 e tache une gnove rassegne di caratar leterari: in program trê apontaments, un ogni mês, dedicâts ae presentazion di ancjetancj libris, par cure di Grazia Pizzoli e in program intal secont Foyer dal teatri des 6 dopomisdì. Si scomence cuntune prime assolude: la presentazion dal gnûf libri dal fotograf e cjaminadôr Emiliano Cribari dal titul “Soltanto d’estate. Un viaggio tra case amate, perse e dimenticate” (Dome di Istât. Un viaç tra cjasis amadis, pierdudis e dismenteadis), jessût par Bottega errante. Un viaç dentri di un Apenin plen di contradizions, dulà che cjatâ une cjase si trasforme intune aventure impussibile. (A.I.) – 19.02.2025