La mostre dai Tomâts e vierç a S. Zorç di Noiâr

Dicembar: mês di spiete, di fiestis, ma ancje di riscuvierte des nestris tradizions. Usancis che si pierdin in timps antigons, dispès incrosantsi cun cults precristians e preromans, cjapâts sù di bande dai gnûfs popui e des lôr religjons. Tant che la tradizion dai Krampus, i diaui trements che in cetancj paîs dal Friûl-Vignesie Julie a acompagnin S. Nicolau inte sô visite vie pe gnot dai 5 di Dicembar. Propit par chest, il Comun di S. Zorç, midiant dal Sportel associât pe lenghe furlane e dal Infopoint, al à inmaneât une mostre su la mascare di len, a tacâ di chê forsit plui cognossude in Friûl: il Tomât de tradizion di Tarcint, par dopo passâ ae funzion seniche, in graciis de colaborazion de compagnie Brat di Porpêt, di agns in vore sul teritori cun laboratoris par fâ une mascare e une des pocjis realtâts in regjon a doprâle inmò vie pai spetacui. Vie pe scree intal edifici Liberty di Vile Dora, in program par sabide ai 2 di Dicembar, aes 10 e mieze a buinore, i Mascarârs di Tarcint e la Compagnie Brat a contaran al public cemût che a nassin lis lôr oparis. (A.I.) – 30.11.2023