La storie dal confin orientâl contade di Raoul Pupo

Intal 2024 al sarà un aniversari impuartant pes tieris di confin dal Adriatic orientâl: il ventenâl de jentrade de Slovenie inte Union Europeane e la rimozion consecuente dal confin cu la Italie, perfezionade intal Dicembar 2007 cu la jentrade dal Paîs intal spazi Schengen. Une frontiere incandessente, chê fra Italie e Slovenie, ancje e soredut intal timp de Vuere frede, che e je al centri dai studis di Raoul Pupo, il storic plui cognossût e autorevul dal confin orientâl, par agnorums docent di Storie li de Universitât di Triest, simpri focalizât su la frontiere adriatiche e sui acjadiments che a àn segnât il moviment di popolazions in Europe intal Nûfcent. La seconde edizion dal cartelon “Apontaments cu la storie”, promovût de associazion Friuli Storia, e tache cuntune lezion sul teme “Storie e storiis dal confin orientâl”, vinars aes 6.30 sore sere intal Auditorium di Paulêt. (A.I.) – 23.11.2023