La vôs di pre Turoldo, il ricuart di Castiglione

Secont e ultin apontament sabide al 1n di Avrîl, des 5.30 dal dopomisdì, dal cicli di iniziativis “Esercizi di memoria”, inmaneât al Teatri Gnûf “Giovanni da Udine” in colaborazion cul Ente Regionale Teatrale/Archivio Castiglione e il Centri Studis pre David Maria Turoldo, par ripassâ la prime metude in sene di “I Turcs tal Friûl”. Scrit di Pier Paolo Pasolini intal 1944, ma jessût dome che un an dopo la sô muart, l’at unic al à debutât a Vignesie intal Novembar 1976, in graciis dal Piccolo Teatro Città di Udine in colaborazion cul Teatri “La Fenice” di Vignesie, pe regjie di Rodolfo Castiglione. Lis musichis di Luigi Nono, i elements senografics di Luciano Ceschia, lis diapositivis di Italo Zannier e la vôs regjistrade di pre Turoldo – che si podarà sintî vie pe cunvigne – a àn inricjît il spetacul. Il ricuart dal “Giovanni da Udine” al va a onorâ e memoreâ ducj lôr. (A.I.) – 30.03.2023