La vuere tai Balcans intal romanç di Federica Manzon

Federica Manzon e torne inte citât là che e je nassude par presentâ il so gnûf libri “Alma”, jessût par Feltrinelli, joibe ai 15 aes 6 dopomisdì intai spazis de ex Tipografie Savio di Pordenon. La scritore e dialogarà cul curadôr dal festival Dedica, Claudio Cattaruzza, intant che la atore Carla Manzon e curarà cualchi leture cjolte dal romanç. Federica Manzon, che vuê e je a stâ a Milan e a Triest, e à scomençât intal 2008 cul romanç “Come si dice addio” (Cemût che si dîs adiu) e e à vinçût tancj premis. Intal ultin lavôr, ambientât a Triest, la storie personâl e la vuere dai Balcans si fondin intune vicende che e puarte a riflessions profondis e domandis su lis relazions, su la identitât e sul rapuart cul passât. (A.I.) – 14.02.2024