“No stâ a fâti contâ la storie dal ors: ven su YoupalTubo!”. Al è chest il sproc che la ARLeF – Agjenzie regjonâl pe lenghe furlane e à sielzût pe gnove campagne di promozion che e tacarà cui 18 di Otubar. Une detule che si cjatarà in ducj i media, ma soredut tai social networks, che a son il mieç di comunicazion plui doprât dai zovins.
La iniziative e je stade presentade de ARLeF, ai 17 di Otubar, cuntune conference stampe te sede di Udin de Regjon Autonome Friûl-Vignesie Julie, li che a son intervignûts l’assessôr regjonâl aes Autonomiis locâls, Pierpaolo Roberti, in videoconference, il president de Agjenzie, Eros Cisilino e il diretôr de ARLeF, William Cisilino. A jerin presints Chei di Udin (ven a stâi Mattia Cantarutti e Federico Iob), doi dai zovins protagoniscj de campagne, in rapresentance dai fantats e des fantatis di YoupalTubo e Max Sganga, innomenât youtuber triestin.
La ARLeF si indrece ancjemò une volte ai zovins cuntune impuartante iniziative promozionâl. La Agjenzie e lavore za di timp a infuartî chest leam, ancje daûr dal Plan gjenerâl di politiche linguistiche fat bon de Regjon. Lis Gjenerazions Z e Alpha a son di fat un “public” impuartant che al domande atenzion e progjets di comunicazion digjitâl. Ve che alore i testemonis plui adats a son propit i youtubers furlans, che a presentin cun sucès contignûts creatîfs bogns di cjapâ dentri i zovins, ma no dome.
«Vuê e ven presentade une iniziative che e puarte indenant ce che al è stât fissât de Aministrazion regjonâl, in cunvigne cu la ARLeF, tal “Plan gjenerâl di politiche linguistiche pe lenghe furlane 2021-2025”, par implementâ il furlan intal nestri teritori. Al è un Plan che al previôt il disvilup de comunicazion midiant dai mieçs gnûfs, massime chei digjitâi.
L’obietîf al è chel di fevelâ aes gnovis gjenerazions cui imprescj che a doprin ogni dì, ma ancje di rivâ ai furlans che a son ator pal mont, intai fogolârs dai varis Continents», al à marcât cuntun messaç video Pierpaolo Roberti, assessôr regjonâl aes Autonomiis locâls cun deleghe aes lenghis minoritariis.
«Al è cun plasê che o presentìn al public cheste gnove campagne publicitarie che si fâs notâ pal so stîl tratîf. O sin sigûrs che e rivarà a cjapâ la atenzion di dute la popolazion, ma soredut chê dai zovins, graciis ae sielte grafiche e ae partecipazion dai fantats di YoupalTubo che, in chescj agns, a àn frontât no dome aspiets linguistics, ma ancje culturâi, gjeografics e storics doprant il furlan in maniere simpatiche e dinamiche. Cun chest gnûf messaç o fevelìn duncje ai adults di doman, marcant la impuartance de lenghe e de identitât, cuntun lengaç e un stîl grafic che ur son familiârs, par capî il nestri biel Friûl di un pont di viste inedit», al à evidenziât Eros Cisilino, president de ARLeF.
«L’obietîf dai fantats di YPT al è chel di cjapâ dentri i zovins misurantsi propit cun chei che a son i interès di ogni element dal grup. La storie, la nature, il mangjâ e il nestri teritori a son contâts cun codiçs comunicatîfs che a fasin part dal mont dai zovins. La lôr maniere di jessi frescs e ironics e cjape e e plâs sedi a cui che il furlan lu fevele ogni dì, sedi a cui che lu fevele pôc o che no lu cognòs. Cui lôr videos i fantats di YPT a mandin un messaç clâr: il furlan al è part de lôr identitât e al è une lenghe che si pues doprâ par fevelâ di cualsisei argoment», al à zontât il diretôr de Agjenzie, William Cisilino.
La strategjie comunicative de campagne de ARLeF e tache propit dai social: di TikTok a Facebook, tocjant Instagram e YouTube, cence dismenteâsi di WhatsApp. E propit tai social si fevelarà sigûr dal video di Mattia Cantarutti e Federico Iob (“Chei di Udin”): “Parlare friulano a Trieste”. Lant daûr di un format di YoupalTubo che al à tant sucès, “Chei di Udin” a àn domandât ai triestins, e tra chei ancje al innomenât “coleghe” Max Sganga, di misurâsi cu la lenghe furlane. Il risultât al è un “Quiz Mortâl” une vore sureâl e divertent, che al regale tantis ridadis.
Par television, invezit, al è previodût un spot di 30 seconts, un concentrât di tocuts di videos di YoupalTubo che al pant une vore ben la ricjece di contignûts dal canâl. Ancje il spot radiofonic, come chel televisîf e la campagne Adv, al invide il public a stâi daûr al canâl.
Su la stampe, infin, il protagonist al è un ors fûr dal ordenari: scufis stereo grandis tes orelis e vistîts in stîl rap. Al clame la atenzion dai letôrs, rimandant ae detule furlane No stâ a fâti contâ la storie dal ors: ven su YoupalTubo!. La campagne e je completade di un depliant che al marche i aspiets plui impuartants dal canâl. (a.d.g.) – 17.10.2024
