L’emigrant furlan che al à inventât il balon

Il balon moderni al à di dî graciis al Friûl. Propit la emigrazion furlane in Argjentine e à permetût la nassite dal balon cence cusiduris, che al à consintût une pratiche plui sigure pai zuiadôrs. Un esemplâr di chest balon mitic al è in mostre te Sagre dal Vin di Cjasarse, intal Centri comunitari parochiâl, dentri de mostre che e conte i 100 agns de scuadre locâl di balon Sas Cjasarse e i siei protagoniscj in cjamp: di Pier Paolo Pasolini a Bryan Cristante, centricjampist de Rome e de Nazionâl taliane. “La invenzion dal balon moderni” e je une conte par grancj e piçui che vinars ai 3 aes 6 dopomisdì e permetarà di cognossi une biele storie di emigrazion e sport, chê di Antonio Tosolini, che al vignive di Feletan di Tresesin, Luis Romano Polo di For di Sot e il piemontês Juan Valbonesi. Ven a stâi, i protagoniscj di cheste grande invenzion intai agns ’30 dal secul passât. (A.I.) – 02.05.2024