Cul an gnûf, come simpri, al rive puntuâl ancje il moment di iscrivi i fruts a scuele. Propit in cheste ocasion, che e sedi une iscrizion ae scuele de infanzie, primarie o secondarie di prin grât, tacant dai 21 di Zenâr dal 2025 (e fin ai 10 di Fevrâr), i gjenitôrs a podaran decidi di aderî al insegnament dal furlan pai lôr fîs par dute la durade dal cicli scolastic. E je une sielte che l’an passât e à fat adiriture il 78% des fameis, in graciis di une cussience simpri plui grande sui vantaçs linguistics, cognitîfs e culturâi di une educazion plurilengâl. Une vere oportunitât in Friûl, se si pense che une frute o un frut che a studiin il furlan a imparin miôr ancje l’inglês e a incressin lis lôr abilitâts logjichis matematichis e creativis. Nol è duncje un câs se la scuele, e la formazion in gjenerâl, a son un dai elements centrâi dal “Plan gjenerâl di politiche linguistiche pe lenghe furlane 2021-2025”.
Il percors didatic dal furlan al è di almancul 30 oris di studi par an e nol gjave oris a chês altri materiis. La leç, di fat, e previôt che al sedi tal 20% dal curriculum che lis scuelis a stabilissin in maniere autonome. I gjenitôrs a podaran sielzi di zovâsi dal insegnament de lenghe furlane tal moment de iscrizion online sul portâl dal MIUR www.istruzione.it/iscrizionionline (tal câs de scuele primarie e di chê secondarie di prin grât) o suntun modul di cjarte (tal câs de scuele de infanzie). Lis segretariis di ogni istitût, dut câs, a son simpri a disposizion par cualsisedi sclariment.
Cun di plui, par supuartâ la ativitât didatiche in classe al è “Anìn!”, il manuâl che al compagne i arlêfs de scuele primarie a scuvierzi la lenghe e la culture furlane. Un invistiment pal avignî de lenghe promovût de ARLeF – Agjenzie regjonâl pe lenghe furlane e de Regjon Autonome Friûl-Vignesie Julie, donât a ducj i students che a sielzin di imparâ il furlan a scuele. Pes classis 1e e 2e, al è stât realizât un volum par svicinâsi in maniere graduâl ae lenghe. Chel pe 3e, 4e e 5e, invezit, al à aprofondiments su la storie e su la gjeografie dal Friûl, su la lenghe e su la leterature. Dut intune dimension plurilengâl, cu la presince dal inglês e di chês altris lenghis che si fevelin tal teritori regjonâl.
A cui che si domande ancjemò parcè che l’insegnament dal furlan a scuele al sedi une oportunitât, si pues rispuindii che nus al dîs la sience: cressi cun plui lenghis, za di cuant che si è une vore piçui, al permet di imparânt cun plui facilitât altris, tant che l’inglês par esempli, ma no dome. No son dubis che si trati di une vere risorse cognitive di tignî in grande considerazion. Lis evidencis sientifichis a mostrin ancje che i fruts bilengâi a disvilupin une capacitât di aprendiment plui grande, une velocitât di comprension plui svelte e abilitâts logjichis matematichis e creativis plui altis. Ma no dome: si adatin cun plui facilitât ai cambiaments, di là di vê un propension plui grande tal vierzisi bande chei altris. Infin, e je ancje la salût dal cerviel: cul doprâ plui lenghis si lu manten zovin e agjil, intardant i pericui di demence e Alzheimer. (a.d.g.) – 16.01.2025
