Lis imagjins “di chel altri” a Cjase Cavazzini

Si scree vinars ai 13 te Cjase Cavazzini, il Museu di Art Moderne e Contemporanie di Udin, il percors espositîf “Come costruisci le immagini dell’altro?” (Cemût fasistu lis imagjins di chel altri?), par cure di Lorenzo Lazzari, che si podarà visitâ fint ai 16 di Març dal 2025 e che al met in relazion cinc oparis – cine e video – di ancjetancj artiscj internazionâi, za ospitadis intai plui impuartants museus di dut il mont, par esplorâ la culture ocidentâl. La otave edizion di “Mind the gap”, un progjet dedicât aes arts visivis, inviât di Altreforme intal 2017 e promovût in colaborazion cun diviersis realtâts culturâls e istituzionâls de regjon, si ispire ae figure di Franco Basaglia par cjapâ dentri cuâi che a son i condizionaments che, in maniere cussiente o mancul, nus puartin a costruî une opinion su alc o su cualchidun. Ven a stâi, cemût che si fâs sù intai nestris cjâfs la imagjin “di chel altri”. (A.I.) – 12.12.2024