Lis oparis dal artist furlan Piermario Ciani donadis al Mart di Trent e Rovereto

Fotograf, pitôr, sperimentadôr de art postâl, autôr di collage su maiutis e adesîfs, agjitadôr culturâl ma ancje fornâr a Bertiûl tant che il rest de sô famee, al è stât in contat cun artiscj di dut il mont epûr simpri fedêl al so paîs, di dulà che no si è mai movût. Piermario Ciani al veve une personalitât poliedriche, al jere un om sudizionôs che nol fevelave de sô art. Tancj paisans ancjemò si maravearessin se a savessin che lis oparis de sô produzion a son stadis acuisidis dal Mart, il Museu di art contemporanie di Trent e Rovereto, une ecelence assolude in Italie. Propit cheste donazion volude dai erêts, e organizade di Emanuela Biancuzzi, la ultime compagne di vite di Ciani, e je stade presentade intune conference stampe intal palaç de Regjon di Udin, a cuasi 17 agns de muart dal artist furlan, tal 2006. La fie Erika Ciani e à comunicât l’intindiment di donâ ancje ciertis oparis al Comun di Bertiûl e altris a Cjase Cavazzini. (A.I.) – 06.02.2023