Lis oparis di Amedeo Giacomini letis in television

Martars ai 23 aes 9.20 sot sere e vinars ai 25 in repliche e larà in onde su Rai3 bis  “Il mont intune pagjine”, prodot di Agherose e diret di Dorino Minigutti. Un documentari curt di Minigutti e di Martina Delpiccolo, che al nas di une idee di leterature furlane “vive” in dialic tra îr e vuê, jenfri finzion creative e realtât, personaçs e personis, ae scuvierte di temis e di significâts inedits e di confronts. Martina Delpiccolo e puarte il spetatôr tra lis pagjinis dal autôr furlan Amedeo Giacomini (1939-2006), poete, contadôr, filolic, tradutôr, insegnant, origjinari di Vildivar, vincidôr di varis premis, tra chescj Rapallo, Nonino Risit d’aur e San Simon. In prose e in poesie al à contât il so mont, la sô realtât umane e esistenziâl di scritôr profont, ma ancje diret, ironic, sclet. Il documentari curt al devente ancje la ocasion par un viaç intal teritori dal Friûl. (A.I.) – 22.01.2024