Maravee, la art e je cuasi un circ

Ideât tal 2002 di Sabrina Zannier par puartâ la art contemporanie a un public simpri plui larc, mostrant dissiplinis artistichis diferentis e argoments condividûts di ducj, il festival “Maravee” al à tirât dentri vie pai agns cuasi cuatricent artiscj in vincj lûcs diferents de regjon. Deventât “Maravee Circus”, il festival al torne cuntune edizion speciâl incentrade su la figure e su la metafore dal acrobat, cui che al stâ intun ecuilibri precari, ma cence mai colâ, fasint un percors che al lasse simpri ducj cuancj cence flât… Joibe ai 27 tal Museu de ex Centrâl idroeletriche “Pitter” di Malnîs, un straordenari esempli di architeture industriâl dal Nûfcent, dulà che la tecnologjie e à mudât la aghe de Ciline in energjie, la scree cuntun spetacul: “Acrobati del Corpo e della Psiche”. Un spetacul itinerant che al puarte sul palc la atore Claudia Contin Arlecchino, l’Ensemble Armonia, lis acrobatis (di Tumblerart) Laura Menegon e Elisa Grillo. Il stes dì si vierç ancje une mostre di sculture, piture, video e curtmetraç, “In bilico”, che al presente lis oparis dai artiscj Willy Verginer, Christian Verginer, Debora Vrizzi e Cabiria Lizzi. (A.I.) – 26.06.2024