Mimesis, la filosofie a Udin e fronte il teme dal digjitâl

E je partide a Udin la decime edizion dal “Festival Mimesis”, che fint a domenie ai 29 e po dopo dai 3 ai 5 di Novembar al animarà Udin continuant a segnâ, un an daûr chel altri, lis liniis dal dialic jenfri filosofie e atualitât sul fîl ros de trasformazion digjitâl. Lis Inteligjencis Artificiâls e i sistemis virtuâi a son tra i argoments che a saran tratâts di plui di 70 vôs dal nestri timp intun calendari plen di incuintris, conferencis e dibatiments cun sienziâts, leterâts, poetis, inzegnîrs e politics. Intune cun nons tant che Peter Sloterdijk e Pierre Lévy, i vincidôrs dal Premi “Udine Filosofia” 2023 (sabide ai 29 la consegne), a daran vite a un confront ampli e complès là che al sarà pussibil cjatâ rispuestis, ispirazions di riflession e aprofondiments su lis grandis domandis dal dì di vuê. (A.I.) – 26.10.2023