Mittelfest: i “disordins” a son stâts preseâts dal public

Belanç positîf pal “Mittelfest 2024”, che domenie passade al à sierât la sô trentesime tierce edizion e un lavôr di scuadre dilunc di trê agns, dedicât ae “sinfonie dal caos”. Il diretôr artistic Giacomo Pedini, che chest an al veve sielt il teme “disordins”, al à pandût l’argoment che al vuidarà la edizion dal an che al ven: i “tabù”. La ricjece de propueste – teatri, musiche, danze e circ – e la varietât di spetacui a àn rinfuarçât la dople anime dal festival, internazionâl e regjonâl tal stes timp, proietant Cividât e dute la regjon Friûl-Vignesie Julie intal sisteme dal spetacul dal vîf internazionâl. Trente i progjets presentâts di un totâl di 431 artiscj ducj presints a Cividât: chei plui preseâts a son stâts “Le tue parole”, un omaç al poete Pierluigi Cappello cun Giuseppe Battiston e Piero Sidoti, la tornade di Movi Ovadia che al è tornât al Mittelfest con “Senza confini”, une storie di “ebreus e zingars”, “Full Moon” di Joseph Nadjil e i trê spetacui itinerants. (A.I.) – 30.07.2024