Mosaics di Europe: al è il moment dal curtmetraç

Meti in lûs il multiculturalisim e il plurilinguisim di une citât dulà che il furlan al è stât une lenghe francje par cui che al jere di marilenghe taliane, slovene, todescje e ebraiche. E je la fonde de rassegne “Mosaics di Europe”, inmaneade dal Teatri Stabil Furlan cul supuart de Regjon, de Fondazion Carigo e dal Comun di Gurize. La manifestazion, cul supuart organizatîf di Antonio Devetag, promovude ancje de ARLeF, de Aclif e dal Kulturni Dom di Gurize, cu la media partneship de Rai F-VJ e di Telefriuli, e conte fint ai 19 di Dicembar lis diferentis animis de capitâl de culture europeane cun cuindis apontaments. La programazion e va indenant martars ai 10 tal Kinemax cun “Francesca”, il curtmetraç une vore poetic dal regjist gurizan Francesco Macedonio e po dopo une cunvigne cun Igor Devetak, Alessandro Quinzi, Lucio Fabi e Alessandro Cattunar. (A.I.) – 09.12.2024