Mostre di libris di artist tal Museu di Pesariis

Il comitât furlan DARS – Femine Art Ricercje Sperimentazion di Udin, in graciis de poie de Regjon Friûl-Vignesie Julie, al organize fint ai 15 di Setembar intai spazis dal Museu de Orloiarie di Pesariis (Prât) la mostre “LIMITLESS_Beyond time”. La esposizion temporanie, rivade chest an ae tierce edizion, e indaghe il teme dal timp traviers il mieç espressîf dal libri di artist. Dîs artistis a esponin il risultât de ricercje di un lôr spazi personâl, imagjinari e naturâl, dulà che la art e il timp si ispirin e si fondin cence limits. La scree si tignarà sabide ai 20 aes 6 dopomisdì. (A.I.) – 19.07.2024