Fiorenza Cedolins e Roberto Valerio a son stâts nomenâts diretôrs artistics dal Teatro Nuovo Giovanni da Udine. Lis nominis a son stadis anunziadis in vie uficiâl vuê, ai 17 di Fevrâr dal 2023, dilunc di une conference stampe che i àn partecipât i gnûfs incargâts – Cedolins tant che diretore de musiche Artistiche e Danze e Valerio tant che diretôr artistic Prose – il president de Fondazion Teatri dal Teatro Nuovo Giovanni da Udine, Giovanni Nistri, il sindic di Udin, Pietro Fontanini, e Fabrizio Spadotto de Direzion centrâl culture e sport – Servizi ativitâts culturâls in rapresentance de Regjon Friûl-Vignesie Julie.
Sodisfazion e je stade esprimude dal president e di dut il Consei di aministrazion de Fondazion pe sielte dai gnûfs diretôrs, nons di alt lustri intal setôr dal spetacul dal vîf e de musiche.
Classe 1966, sopran, docente universitarie, Cedolins in plui di trente agns di cariere e je stade protagoniste des plui impegnativis parts di sopran in ducj i teatris principâi dal mont e festivai internazionâi, fra chescj a son la Scala di Milan, la Fenice di Vignesie, il Metropolitan di New York, la Royal Albert Hall di Londre, la Arena di Verone, i Festivai di Shangai e Salisburc.
Valerio, nassût intal 1970, diplomât ae Accademia Nazionale Silvio D’Amico di Rome, al è atôr, regjist e organizadôr di festival. Dal 2019 al è diretôr artistic de Accademia Ludwig, scuele di formazion professionâl teatrâl. (A.D.G.) 17.02.2023
